DƏBİYYAT – MƏNƏVİYYATDIR

Ədəbi növ və janrlar — bədii əsərlər üç ədəbi növə ayrılır: epik, lirik və dramatik növ. Epik əsərlərdə təhkiyə, təsvir, lirik əsərlərdə tərənnüm, dramatik əsərlərdə göstərmə əsas, aparıcı əlamətlərdir. Hər bir ədəbi növün müxtəlif şəkilləri vardır ki, onlara ədəbi janrlar deyilir.
Məsələn, epik əsərlərin əfsanə, nağıl, dastan, təmsil, hekayə; lirik əsərlərin rübai, qəzəl, bayatı, gəraylı, qoşma; dramatik növün isə dram, komediya, faciə janrları vardır. Dramatik janrlara pyes də deyilir.

Ədəbiyyat terminləri lüğəti

Ahəng — eyni ölçülü səslərin növbələşməsi, təkrarlanması və bir-birini izləməsidir. Ölçü, qafiyə, bölgü, rədif şeirdə ahəng yaradan əsas vasitələrdir.

Alleqoriya — yunan sözüdür, rəmzlə danışmaq deməkdir. Alleqoriyada fikir şəxsləndirilmiş obrazlar: heyvanlar, quşlar, cansız əşyalar, bitkilər və s. vasitəsilə çatdırılır. Məsələn, Füzuli “Söhbətül-əsmar” poemasında bağ, bostan bitkilərini canlandırma yolu ilə mənsəb, şöhrət düşkünü olan insanları tənqid etmişdir.

Bədii sual — bəzən əsərdə fikir sual şəklində ifadə olunur. Bu, hər hansı məlumatı öyrənmək üçün qurulan sual cümləsindən fərqli olaraq, emosionallığı artırmaq, fikrin daha qabarıq ifadəsinə nail olmaq məqsədi daşıyır. Bədii sualdan lirik əsərlərdə daha çox istifadə olunur.

Bədii təsvir vasitəsi — əsərdə bədii dilin mühüm tərkib hissəsidir. Əşya və haidsələrin oxşarlığı əsasında yaradılaraq məcazi məna daşıdıqları üçün onlara məcazlar da deyilir. Epitet, təşbeh, metafor və s. daha çox işlənən bədii təsvir vasitələridir.

Bədii ifadə vasitəsi — fikrin bədii təsir gücünü qüvvətləndirən vasitələrdir. Bütöv cümlə ilə ifadə olunduğu üçün onları poetik sintaksis və ya sintaktik fiqurlar da adlandırırlar. Bədii əsərlərdə tez-tez rast gəlinən təkrir, mübaliğə, bədii sual, bədii təzad, kinayə və s. bədii ifadə vasitələridir.

Bəhr — əruz vəznində misra bölümünü, uzun və qısa hecaların ardıcıllığını, fasilələrin yerini təfilələr (fAilAtün, məfAİlün və s.) müəyyənləşdirir. Onlar birləşərək əruzun müxtəlif bəhrlərini (həzəc, xəfif, münsərih və s.) yaradır. Məsələn, M.P.Vaqifin “Bax” qəzəli fAilAtün təfiləsinin 3 dəfə bütöv, 1 dəfə yarımçıq (fAilün) işlənməsi ilə əmələ gəlmiş rəməl bəhrindədir.

Bənzətmə — məcazın növlərindən biri. Bədii əsərdə bir əşyanın, hadisənin hər hansı bir əlamətcə özündən daha qüvvətli olan əşyaya, hadisəyə oxşadılmasına deyilir. Bənzətmə əvəzinə, ərəb sözü olan, oxşatmaq, bənzətmək mənasını verən təşbeh termini də işlənir. Bənzəyən, bənzədilən, bənzətmə qoşması və bənzətmə əlaməti təşbehin ünsürləridir. Əgər 2-ci və 3-cü ünsür olmadan yaradılarsa, buna mükəmməl təşbeh deyilir. M.P.Vaqifin “Pəri” qoşmasında belə təşbehlər vardır:

Boyun sürahidir, bədənin büllur.

Boy — dastanın bir qolu, bitkin hissəsidir.

Beyt — şeirin iki misradan ibarət olan nisbətən bitkin hissəsinə deyilir.

Bədii təzad — əsərdə məzmunca bir-birinə zidd iki anlayış və ya vəziyyətin qarşılaşdırılması bədii təzad yaradır. Bu, fikrin daha qabarıq, təsirli çatdırılmasına səbəb olur. M.Füzulinin aşağıdakı misralarında lirik qəhrəmanın vəziyyəti bədii təzad vasitəsilə daha təsirli ifadə olunmuşdur: Tutuşdu ğəm oduna şad gördüyün könlüm, Müqəyyəd oldu ol azad gördüyün könlüm.

Dastan — şifahi xalq ədəbiyyatının epik növünün irihəcmli janrıdır. Nağıldan fərqli olaraq, dastan həm nəsr, həm də nəzm hissəsindən ibarət olur. Dastanda nəsrlə nəzm növbələşir, hadisələr nəsr dili ilə nəql edilir, qəhrəmanların hiss və həyəcanları şeir parçaları vasitəsilə verilir. Bu xüsusiyyətinə görə dastana epik-lirik əsər də deyilir. Şifahi xalq ədəbiyyatımızda qəhrəmanlıq və məhəbbət dastanları geniş yayılıb. Azərbaycan dastanları ozan-aşıq sənətinin məhsuludur. Onlar süjet xəttinin bitkinliyi ilə seçilir.

Deyişmə — şairlər, yaxud aşıqlar arasında yarış, müsabiqə məqsədilə keçirilən şeirləşmə. Deyişmədə iki və daha artıq sənətkar iştirak edir.

Dialoq — yunanca söhbət, müsahibə deməkdir. Bədii əsərdə iki və daha artıq şəxsin bir-biri ilə danışığıdır. Dialoq əsərdəki hadisələrin mahiyyətinin, surətlərin daxili aləminin açılmasında mühüm rol oynayır.

Dibaçə — ərəb sözü olub müqəddimə deməkdir. Klassik ədəbiyyatda divanların, əlyazma kitabların girişi, ön sözü.

Dram — yunanca fəaliyyət, hərəkət deməkdir. Dramatik növün janrı olan dramda həm komediya, həm də faciəyə xas əlamətlər özünü göstərir.
Dramda konflikt ciddi həyat ziddiyyətləri, güclü xarakterlərin toqquşmasından yaranır. Belə əsərlərdə komediya üçün səciyyəvi olan gülməli epizodlara yer verilir. Lakin dramın bütünlüklə komik, gülməli səhnələr üzərində qurulması mümkün deyil. Dramın qəhrəmanı da faciə qəhrəmanı kimi ciddi münaqişəyə girsə də, faciədən fərqli olaraq, qarşılaşdığı güclü şər qüvvələrə qalib gəlir. Dram janrında əsərlər həm nəsrlə, həm də nəzmlə yazılır.

Dramaturq — dramatik növün komediya, dram, faciə janrlarında əsər yazan sənətkarlara deyilir.

Dramaturgiya — sənətkarın dramatik əsərlərinin məcmusu. Bütöv bir tarixi dövrün dramatik əsərlərinə də birlikdə dramaturgiya deyilir. Məsələn, Cəlil Məmmədquluzadənin dramaturgiyası. XX əsr Azərbaycan dramaturgiyası və s.

Divan — fars sözüdür, mənası toplu, cəm deməkdir. Şərq ölkələrində bir şairin əsərlərinin məcmuəsinə deyilir. Divanın tərtibində qəsidə, qəzəl, qitə və s. janrlar üzrə sıralanma gözlənilir, sonra həmin şeirlər qafiyənin son hərfi əsas götürülməklə əlifba sırası ilə düzülür

Epik-lirik növ — epik-lirik əsərlərdə təhkiyə və tərənnüm kimi həyatı əksetdirmə üsulları qovuşur. Dastan və poemada həm əhvalatların nağıl edilməsinə, təhkiyə və təsvirə, həm də hadisələrin doğurduğu hiss-həyəcanların ifadəsinə yer verilir. Füzulinin “Leyli və Məcnun” əsəri epik-lirik poemadır. Burada şair qəhrəmanın daxili aləminə, hiss-həyəcanlarına nisbətən hadisələrin təsvirinə, təhkiyəyə daha geniş yer vermişdir. Lirik-epik poemalarda isə qəhrəmanın daxili aləmi, hiss-həyəcanlarının ifadəsi hadisələrin təsviri, təhkiyəsinə nisbətən ön planda durur, daha qabarıq verilir.

Epitet — məcazın növlərindən biridir, yunanca əlavə deməkdir. Bədii əsərdə sözün təsir gücünü artırmaq üçün ona artırılan məcazi mənalı təyinedici sözdür (sifətdir). Epitetə bədii təyin də deyilir. Şirin meyvə birləşməsində şirin sözü məcazi mənada işlənmədiyindən epitet deyil, şirin söz ifadəsində isə bu söz məcazi məna qazandığından epitet sayılır.

Epos — yunanca danışmaq, söyləmək, nağıl etmək, fikri təhkiyə əsasında çatdırmaq mənasında işlənir. Şifahi xalq ədəbiyyatında epos qəhrəmanlıq dastanlarına da deyilir. Məsələn, “Koroğlu” eposu və s.

Ədəbi qəhrəman — təsvir olunan hadisələrin mərkəzində duran və yazıçının irəli sürdüyü ideyanın əsas ifadəçisinə çevrilən surətə deyilir. Bədii əsərin qəhrəmanı müsbət olduğu kimi, mənfi də ola bilər.

Ədəbi növ və janrlar — bədii əsərlər üç ədəbi növə ayrılır: epik, lirik və dramatik növ. Epik əsərlərdə təhkiyə, təsvir, lirik əsərlərdə tərənnüm, dramatik əsərlərdə göstərmə əsas, aparıcı əlamətlərdir. Hər bir ədəbi növün müxtəlif şəkilləri vardır ki, onlara ədəbi janrlar deyilir.
Məsələn, epik əsərlərin əfsanə, nağıl, dastan, təmsil, hekayə; lirik əsərlərin rübai, qəzəl, bayatı, gəraylı, qoşma; dramatik növün isə dram, komediya, faciə janrları vardır. Dramatik janrlara pyes də deyilir.

Ədəbi məclis — dünyagörüş, yaradıcılıq baxımından yaxın olan yazıçıların birliyi. Ədəbi məclislərdə sənətkarların öz əsərləri, ədəbiyyatşünaslığa dair nümunələr oxunur, müzakirə edilir, ədəbi hadisələrə, yeniliklərə münasibət bildirilir.

Ənənə — ərəb sözüdür. Tarixən meydana gələrək nəsildən-nəslə keçən adət, əxlaq normaları, görüşlər, zövqlər və s. Söz sənətində əvvəlki ədəbi hadisə ilə yeni ədəbi hadisə arasında ardıcıl varislik əlaqəsi ənənə adlanır. Ənənə bir və ya bir neçə yazıçının yaradıcılığına xas olan ideya-sə- nətkarlıq xüsusiyyətlərinin sonrakı sənətkarlar tərəfindən öyrənilməsi və inkişaf etdirilməsidir. Məsələn, C.Məmmədquluzadə, Ə.Haqverdiyev, M.Ə.Sabir realizminin ideya-bədii kökləri M.F.Axundzadə və Q.Zakirin yaradıcılıq ənənələri ilə üzvi surətdə bağlıdır.
Latınca yenilik mənası verən novatorluq ənənə ilə sıx bağlıdır. Həyatda baş verən hadisələrlə, insanların arasında yaranan yeni münasibətlərlə əlaqədar bədii ədəbiyyatda özünü göstərən keyfiyyət dəyişikliyi novatorluq adlanır. Novatorluq ənənələrin üzərində yaranaraq, onları inkişaf etdirərək yeni ənənələrin meydana gəlməsinə zəmin olur.

Əruz vəzni — ərəb şeirinin əsas vəznidir. Ədəbiyyatda əruz sözü şeir haqqında elm mənasında işlənir. Bu vəzn VIII əsrdə ərəb alimi Xəlil ibn Əhməd tərəfindən yaradılmış və sistemə salınmış, sonralar digər müsəlman ölkələrinə, o cümlədən Azərbaycana da yayılmışdır. Əruzda əsas şərt misrada hecaların sayca bərabər olması yox, uzun və qısa hecaların bir qayda ilə düzülməsidir. Bəzən əruzla yazılan şeirin birinci misrasında 10, ikinci misrasında 11 heca ola bilər. Belə olduqda ahəng hecanın uzanması və qısalması hesabına yaranır.

Faciə — Faciə ərəb sözü olub müsibət, bədbəxtlik deməkdir. Dramatik növün janrlarından olan faciədə konflikt fəlakətlə bitən kəskin, barışmaz həyati ziddiyyətlər üzərində qurulur, əksər hallarda qəhrəmanın ölümü ilə nəticələnir. Faciənin konfliktinin əsasında duran problemlər, ziddiyyətlər fərqli məzmunda olur. Mahiyyət etibarilə faciədə mənəvi-əxlaqi, siyasi problemlər, kəskin fəlsəfi, ideya, dünyagörüşü toqquşmaları, müxtəlif ictimai təbəqələr arasında qarşıdurma, ailə-məişət zəminində barışmaz ziddiyyətlər həyati konfliktə çevrilir.
Mənəvi-əxlaqi faciələrdə konfliktin əsasında cəmiyyətdə hakim olan, ictimai tərəqqi yolunda maneəyə çevrilən qayda-qanunlara, adət-ənənələrə qarşı cəmiyyəti yeni əxlaqi meyarlar əsasında qurmaq istəyən qüvvələrin barışmaz mübarizəsi durur. Belə faciələrin humanist prinsiplərlə yaşayan, ictimai tərəqqi üçün mübarizə aparan qəhrəmanları tamaşaçının, oxucunun qəlbində yüksək hiss, həyəcan, yaradıcı fəaliyyət, böyük mənəvi ideallar uğrunda mübarizə aparmaq istəyi doğurur. Faciə çox zaman qəhrəmanın ölümü ilə bitir. “Misibəti-Fəxrəddin” faciəsində qəhrəman — böyük arzularla, ümidlərlə yaşayan, tərəqqipərvər qüvvələri təmsil edən Fəxrəddin cismən məğlub olsa da, ona qarşı çıxan, köhnə adət-ənənələrin təmsilçisi olan qüvvələr üzərində mənəvi qələbə qazanır.
Azərbaycan ədəbiyyatında faciənin klassik nümunələrini N.Vəzirov, Ə.Haqverdiyev, H.Cavid kimi görkəmli sənətkarlar yaratmışlar.

Fəxriyyə — qəsidənin bir növü. Bu janrda yazılmış əsərlərdə müəllif öz şairlik qüdrətindən fəxrlə söz açır.

Gəraylı — aşıq şeirinin geniş yayılmış janrlarındandır. Gəraylının hər bəndi 4 misradan, hər misrası 8 hecadan ibarət olur. Bəndlərin qafiyə quruluşu abvb; cccb; qqqb şəklindədir. Son bənddə şair təxəllüsünü söyləyir.

Hürufilik — bu fəlsəfi cərəyanın adı hüruf (hərflər) sözündən götürülmüşdür. Hürufilər ərəb əlifbasının 28 hərfini Allahın təzahür forması sayaraq onları müqəddəsləşdirirdilər. Onlara görə, insanın üzündə “Allah” sözü yazılıb. Hürufiliyin fəlsəfi əsasını maddiliklə ilahiliyin vəhdəti təşkil edir. Yəni Allah təbiətdən, insandan kənarda deyil, onun mahiyyətindədir. Nəsimi, Xətayi kimi şairlərin yaradıcılığında hürufi ideyalarının bədii əksi mühüm yer tutur.

Xəlqilik — bədii əsərdə milli idealın, milli xarakterin əks etdirilməsidir.

İdeya — seçilmiş mövzu, təsvir edilən surətlər, hadisələr vasitəsilə yazıçının oxucuya çatdırmaq istədiyi başlıca fikir, müəllif niyyətidir.

İnversiya — latın sözüdür, mənası yerdəyişmə deməkdir. Bədii ifadə vasitəsi olan inversiya əsərdə fikrin təsir gücünü artırmaq üçün sözlərin qrammatik ardıcıllığının sənətkar tərəfindən qəsdən pozulmasına deyilir. Dilimizin qrammatik normasına görə, xəbər cümlənin sonunda gəlməlidir. Lakin sənətkar bədii əsərdə, xüsusən nəzm əsərində söz sırasını məqsədli şəkildə pozaraq inversiya yaradır.

Komediya — dramatik növün janrlarından biridir, yunan dilində şən mahnı, nəğmə deməkdir. Komediyada konflikt komik xarakter daşıyır, müsbət ideya ilə mənəvi eybəcərliyin qarşılaşması, aralarındakı ziddiyyət gülüş doğurur. Bu gülüş həm yumor, həm də satira səciyyəli ola bilər.

Kompozisiya — bədii əsərdə həyat hadisələrinin bir-biri ilə əlaqələndirilməsinə və müəyyən bir sistemdə qurulmasına deyilir. Əsərin ideya-məzmununun açılmasında onun quruluşu, tərkib hissələrinin düzülüşü, surətlərin əlaqə və münasibətlərinin təşkili, hadisələrin təsviri mühüm rol oynayır. Yazıçı əsərdə surətləri, hadisələri hansı ardıcıllıqla, necə təqdim edəcəyinə, süjetin inkişaf tərzinə xüsusi diqqət yetirir. Sənətkarın kompozisiyanın qurulmasında istifadə etdiyi vasitələr rəngarəngdir. Epiqraf, proloq, epiloq, lirik haşiyə, peyzaj kompozisiyanın ünsürləridir.

Konflikt — bədii əsərdə süjetin inkişafının, iştirak edənlərin mübarizəsinin əsasını təşkil edən münaqişə, toqquşmadır. Bədii əsərin qəhrəmanlarının xarakteri konflikt vasitəsilə açılır.

Kinayə — bədii ifadə vasitəsinin növlərindən biri olub, fikrin ifadə tərzinin onun əsil mənasına qarşı qoyulmasına deyilir. Kinayə əvəzinə, istehza mənasını verən ironiya termini də işlənir. Kinayədə əsərin qəhrəmanının mənfi cəhəti müsbət mənalı sözlərlə pərdələnərək tənqid olunur. Məsələn, qorxaq adama “igid”, tənbəl adama “zəhmətkeş” deyilməsi kinayə yaradır.

Qafiyə — nəzm əsərində tələffüzcə, səs tərkibi etibarilə bir-birinə yaxın olan sözlərdir. Məsələn: bahar, laləzar.

Qəsidə — lirik növün janrıdır. Daha çox ictimai mövzularda, təntənəli, təmtəraqlı üslubda yazılır, ən azı 15 beytdən, yəni 30 misradan ibarət olur. Qafiyə quruluşu qəzəldəki kimidir: aa, ba, ca, ça, da və s. Qəsidənin minacat, nət, mədhiyyə, fəxriyyə, mərsiyə kimi növləri var.

Qəzəl — lirik növün janrıdır. Daha çox məhəbbət mövzusunda yazılan qəzəl 5-10 beytdən ibarət olur. İlk beyti — mətlə beyt həmqafiyə olur: aa. Digər beytlərin birinci misrası sərbəst, ikinci misrası birinci beytlə həmqafiyə olur, ba, ca, ça, da və s. Qəzəlin son beyti məqtə beyt, ən güclü beyti şah beyt adlanır.

Qitə — ərəbcə parça, hissə deməkdir. Qitə ictimai-siyasi, fəlsəfi məzmunda yazılır. Həcmcə üç beytdən iyirmi beş beytəcən olan qitə ab, cb, db şəklində qafiyələnir. Qitədə mətlə beyt qafiyələnmir, son beytdə şairin təxəllüsü verilmir. M.Füzulinin “Padişahi-mülk” qitəsi bu janrın ən yaxşı nümunələrindəndir.

Qol — dastanın bitkin bir hissəsidir.

Qoşma — lirik növün geniş yayılmış janrlarından biri. Hər bəndi dörd misradan, hər misrası 11 hecadan ibarət olur. Bəndlərin qafiyə quruluşu abvb; cccb; qqqb şəklindədir. Son bənddə sənətkar öz təxəllüsünü söyləyir. Qoşmada bəndlərin sayı tək (3, 5, 7) olur.

Lirika — yunan sözüdür. Lira musiqi alətinin adı ilə bağlıdır. Lirika ədəbiyyatın üç əsas növündən (epos, lirika, dram) biridir. Əgər epik, dramatik əsərdə hadisə əsas yer tutursa, lirik əsərdə bu hadisənin sənətkarın qəlbində doğurduğu hiss və həyəcanların ifadəsi ön plana çıxır.
Lirik əsərdə şairin hadisəyə, ətrafda baş verənlərə müsbət münasibətini əks etdirən tərənnümə geniş yer verilir. Tərənnüm ətraf aləmdə baş verənlərin (əşya və hadisələr, təbiət gözəllikləri) təsiri ilə lirik qəhrəmanda yaranan xoş hislərin, sevincin, fərəhin, müsbət fikir və arzuların obrazlı, ahəngdar ifadəsidir. Məsələn, Aşıq Ələsgər “Yaylaq” şeirində doğma yurdun gözəl təbiətini tərənnüm edir, məhəbbət, vurğunluq hislərini çatdırır. Lirik əsərlərdə müəllifin duyğu və düşüncələrindən, hiss və həyəcanlarından yaranan emosionallıq mühüm yer tutur. Lirika mövzu və məzmunca iki əsas qrupa bölünür: məhəbbət lirikası, ictimai-siyasi lirika. Məhəbbət lirikasında qadına məhəbbət, lirik qəhrəmanın sevgilisinə bəslədiyi səmimi hislər mühüm yer tutur. Vaqifin “Pəri” qoşması qadın gözəlliyinə emosional münasibət ön plana çəkildiyi üçün məhəbbət lirikası nümunəsi sayılır.
İctimai-siyasi lirikada sənətkarın ictimai-siyasi hadisələrə, ictimai quruluşa münasibəti, azadlıq, qəhrəmanlıq, vətəndaşlıq borcu və s. məsələlər öz əksini tapır. Təbiət mövzusunda olan əsərlər təbiət, peyzaj lirikası sayılır.

Lirik qəhrəman — şairin yaratdığı bütün lirik əsərləri əhatə edən şərti termindir. Lirik qəhrəmanın daxili aləmi hadisələr, hərəkətlər vasitəsilə deyil, müəyyən şəraitdə keçirdiyi hislər, həyəcanlar, ruhi vəziyyət vasitəsilə açılır. Lirik qəhrəmanla şairin şəxsiyyəti arasında sıx bağlılıq olsa da, bunları eyniləşdirmək olmaz. Lirik qəhrəmanın fikir və həyəcanlarını həmişə mütləq şairin özünün fikir və həyəcanları kimi qəbul etmək doğru deyil.

Litota — yunanca kiçiltmə deməkdir. Təsvir olunan predmet və ya hadisənin ölçüsünün, qüvvəsinin, əhəmiyyətinin əslində olduğu kimi yox, kiçildilmiş şəkildə təqdim olunması litota adlanır.

Metafor — bədii təsvir vasitəsidir, köçürmə deməkdir. Metaforda müəyyən əşyanın əlaməti müqayisə əsasında digər əşyanın üzərinə köçürülür. Məsələn, təbiət oyandı cümləsində insanın oyanmaq əlaməti təbiətin üzərinə köçürülmüşdür. Metafor təşbehə bənzəsə də, aralarında fərq vardır. Təşbehdə həm bənzəyən, həm də bənzədilən işlənilir: Buludlar insan kimi göz yaşı tökdü. Bu nümunədə təbiət bənzəyən, insan bənzədilən olduğu üçün təşbehdir. Metaforda isə bənzəyən (təbiət) var, bənzədilənin isə özü yoxdur, ancaq əlaməti (göz yaşı tökmək) köçürülür: Buludlar göz yaşı tökdü.

Məcaz — sözün məcazi mənası əsasında yaranan bədii təsvir vasitələrinə — epitet, təşbeh, metafor, metonimiya, simvola deyilir.

Mədhiyyə — klassik poeziyada lirik növün janrı. Qəsidənin bu növündə hökmdarlar, yüksək rütbəli şəxslər təntənəli, dəbdəbəli üslubda təriflənir.

Məclis — ərəb sözüdür, mənası yığıncaq deməkdir. Bədii əsərin bitkin hissələridir. Məsələn, N.Vəzirovun “Müsibəti-Fəxrəddin” faciəsi məclislər şəklində yazılıb.

Məqtə — şeirin (xüsusən qəzəl və qəsidələrin) son beytinə deyilir.

Məliküş-şüəra — Yaxın və Orta Şərq ölkələrində hökmdarların sarayda yaratdığı şairlər məclisinin başçısı olan söz ustadı.

Mənzum roman — nəzm şəklində yazılmış irihəcmli əsər. Nizami Gəncəvinin “Xəmsə”sinə daxil olan əksər poemalar mənzum roman da adlanır.

Mərsiyə — ərəbcə matəm şeiri deməkdir. Qəsidənin klassik ədəbiyyatımızda geniş yayılmış bu növündə daha çox görkəmli şəxsiyyətlərin — müqəddəslərin, hökmdarların, qəhrəmanların, sənətkarların ölümündən doğan qəm, kədər hisləri əks olunur.

Məsnəvi — misraları aa, bb, cc şəklində qafiyələnən, Şərq ədəbiyyatında geniş yayılmış şeir formasıdır. Məsnəvinin hər beyti bitkin bir fikr ifadə edir.
Bu formada yazılan əsərlər mövzu cəhətdən müxtəlif, həcmcə qeyri-məhdud olur. Nizaminin “Xəmsə”si, Xətayinin “Dəhnamə” əsəri məsnəvi formasındadır.

Mətlə — şeirin (xüsusən qəzəl və qəsidələrin) ilk beytinə deyilir.

Minacat — klassik ədəbiyyatda Allahın tərifinə həsr olunan şeir janrı, qəsidənin bir növü. Klassik poemanın başlanğıcında verilən minacatda şair Allahı tərifləyir, ondan kömək istəyir.

Misradaxili bölgü — ifada misraların daxilində fasilələrin yaranmasıdır:

İxtilatın şirin,/ sözün məzəli,
Şəkər gülüşündən /canlar təzəli,
Ellər yaraşığı, /ölkə gözəli,
Nə gözəl doğubsan/ anadan, Pəri!

Monoloq — bədii əsərdə qəhrəmanın digər surətlərə, yaxud özünə müraciətlə söylədiyi nitqdir. Dramatik əsərdə bəzən monoloq qəhrəmanın tamaşaçılara müraciəti şəklində olur. Monoloq vasitəsilə yazıçı obrazın daxili aləmini, fikir və düşüncələrini əks etdirir. N.Vəzirovun “Müsibəti-Fəxrəddin” faciəsində Rüstəm bəyin əsərin başlanğıcındakı monoloqu onun dünyagörüşünü, daxili aləmini ifadə edir.

Mövzu — yazıçının bədii əsərdə diqqət mərkəzinə çəkdiyi əsas həyati məsələlər, səciyyəvi hadisələrdir. Mövzu əsərin ideyası ilə sıx əlaqəlidir.

Müxəmməs — ərəbcə beşqatlı deməkdir. Lirik növün bu janrında bəndlər beş misradan ibarət olur. İlk bənddə bütün misralar həmqafiyə olur: aaaaa. Sonrakı bəndlər bbbba, cccca şəklində qafiyələnir. Son bənddə sənətkarın təxəllüsü verilir. Müxəmməs həm əruz, həm də heca vəznində yazılır. Heca vəznində olan müxəmməsin hər misrası 15 və ya 16 hecalı olur. Vaqifin məşhur “Görmədim” şeiri müxəmməs janrında yazılıb.

Müləmmə — ərəb sözüdür, mənası rəngbərəng, bəzəkli deməkdir. Hər beyti bir dildə olan şeir formasıdır. Azərbaycan şairlərinin müləmmələri, adətən, üç dildə — Azərbaycan, ərəb, fars dillərində yazılırdı. Müləmmə, əsasən, qəzəl və məsnəvi formasında olur.

Mürəbbe — ərəbcə dördlük deməkdir. Lirik növün bu janrı, adətən, ictimai-siyasi və məhəbbət mövzularında olur. Mürəbbe 5-7 bənddən, hər bənd dörd misradan ibarət olur. İlk bənd aaaa şəklində, sonrakı bəndlər isə bbba, ccca şəklində qafiyələnir. Sonuncu bənddə müəllifin təxəllüsü verilir.

Müsəddəs – altılıq deməkdir. Hər bəndi altı misradan ibarət olur. İlk bənd aaaaaa şəklində, sonrakı bəndlər bbbbaa, ccccaa şəklində qafiyələnir.

Nəsr — ədəbi yaradıcılığın iki əsas formasından (nəsr, nəzm) biridir. Nəsrin vahidi cümlədir. Nəsrlə yazılan əsərlər cümlələr və abzaslar şəklində formalaşır. Bu cümlələr ədəbi dil normaları əsasında qurulur, onlarda sözlərin qrammatik sıralanmasının pozulmasına az təsadüf olunur. Nəsrin şeirdən fərqli özünəməxsus ahəngi vardır. Nəsr əsərlərində yazıçı insanların gündəlik həyatını bütün mürəkkəb çoxcəhətliliyi ilə dərk və əks etdirməyə çalışır. Nəsrdə süjet, hadisələrin inkişafı daha çox yer tutur.

Nət — Peyğəmbərin qüdrətindən və müqəddəsliyindən bəhs edən şeir janrı, qəsidənin bir növü. Klassik poemalarda minacatdan sonra nət gəlir.

Nəzirə — başqa bir yazıçının əsərinin təsiri altında yaradılan əsərə deyilir.

Nəzm — ərəb sözüdür, mənası nizam-intizam deməkdir. Bədii əsərin yazılma formalarından (nəzm, nəsr) biridir. Nəzmlə yazılmış əsərlərdə fikir adi danışıq formasından fərqli, emosional şəkildə, misra, beyt, bəndlərdə ifadə edilir. Nəzm əsərlərinin bir xüsusiyyəti də misralarda söz sırasının pozulması hallarının (inversiyanın) geniş yayılmasıdır. Nəzmin əsas əlamətləri bunlardır: ahəng, ölçü, qafiyə, rədif, bölgü və s.

Ölçü — ədəbiyyatşünaslıqda buna vəzn də deyilir. Ölçü və ya vəzn dedikdə şeirdəki misraların həcmi nəzərdə tutulur. Misraların həcmcə və ahəngcə bərabərliyinin gözlənilməsi vəznin əsas tələbidir.

Peyzaj — bədii əsərdə təbiət təsvirinə deyilir. Məsələn, Xətayi “Bahariyyə”də təbiətin bahar fəslində aldığı gözəlliyi təsvir etmişdir.

Poema — bədii ədəbiyyatın epik-lirik təsvir növlərindən biridir. Poemada həyat hadisələri, obrazların taleyi geniş təsvir edilir. Bəzi poemalarda hadisələrin şairdə doğurduğu hiss və duyğulara daha geniş yer verilir. Belə olanda həmin əsər lirik-epik poema adlandırılır. Bəzən isə, əksinə, əhvalat və hadisələrin təsviri üstünlük təşkil edir, müəllifin hiss və duyğularının ifadəsi arxa plana keçir. Belə əsərlər isə epik-lirik poema hesab edilir. Klassik poeziyamızda poema əvəzinə, məsnəvi, dastan, mənzumə terminlərindən istifadə olunub.

Portret — bədii əsərdə surətlərin zahiri görünüşünün təsvirinə deyilir. Portret insan obrazlarının canlı verilməsinə, onların xarakterinin daha yaxşı açılmasına kömək edir.

Povest — rus dilindəki povestvovanie sözündəndir, mənası təhkiyə, nəqletmə deməkdir. Epik növün bu janrı həcm və məzmun tutumuna görə hekayədən böyük, romandan isə kiçik olur. Povestdə bir neçə əhvalatdan bəhs olunur. Romandan fərqli olaraq, burada hadisələr sürətlə inkişaf etməli, onların bir-biri ilə əvəzlənməsi çevik olmalıdır. Bu cəhəti nəzərə alan yazıçı süjet xəttinin əsasını təşkil edən elə həyati hadisə seçməlidir ki, mahiyyətcə sürətli inkişafa zəmin yaratsın və povest çərçivəsinə sığışsın. M.F.Axundzadənin “Aldanmış kəvakib” əsəri bu janrın kamil nümunəsidir.

Realist metod — sənətkarın bədii əsər yazarkən istifadə etdiyi yaradıcılıq metodlarından biridir. Latınca realis sözündəndir, mənası olduğu kimi, həqiqət deməkdir. Realist metodun əsas tələbi həyat hadisələrini olduğu kimi təsvir etməkdir. Bu metodda real hadisələrin təsviri əsas yer tutur.

Realizm — müəyyən dövrdə realist metodla yazıb-yaradan sənətkarları birləşdirən ədəbi cərəyan. XX əsrin əvvəllərində tənqidi realizm bədii metodunun nümayəndələri (C.Məmmədquluzadə, M.Ə.Sabir, Ə.Haqverdiyev və b.) “Molla Nəsrəddin” jurnalının ətrafında birləşmişdilər.

Remarka — dramatik əsərdə iştirak edən şəxslərin zahiri görkəmi, yaşı, səhnəyə gəlməsi və getməsi, davranışı, hisləri, hərəkətləri, səhnədəki vəziyyət və s. haqqında müəllifin verdiyi izahatdır. Remarka çox zaman mötərizə içərisində verilir, pyesi tamaşaya qoyan rejissor, rolları ifa edən aktyorlar üçün bir göstəriş rolunu oynayır. Remarka pyesi oxuyan oxucular üçün də məlumat, izahat mənbəyi olur.

Replika — əsərdə bir obrazın başqasına cavabı. Dramatik əsərdə aktyorun bu və ya başqa səhnədə söylədiyi son sözlərə də replika deyilir. Bu replikadan (son sözdən) sonra digər aktyor öz rolunun sözlərini deməyə başlayır.

Rədif — misraların sonunda qafiyədən sonra təkrar olunan sözlərdir. Məsələn, M.Ə. Sabirin “Əkinçi” satirasında misralarda qafiyədən sonra gələn “əkinçi” sözləri rədifdir:

Məzlumluq edib başlama fəryadə, əkinçi!
Qoyma özünü tülkülüyə, adə, əkinçi!

Roman — fransız sözüdür, vaxtilə roman dillərindən birində yazılmış əsərlərə deyilib. Epik növün irihəcmli janrı olan roman təhkiyə əsasında yazılır, mürəkkəb həyat hadisələri əhatəli, süjet və surətlər sistemi geniş bədii lövhələrlə əks etdirilir. Romanda təsvir edilən hadisələr zaman baxımından geniş bir dövrü əhatə edir, qəhrəmanların sayı çox olur, surətlərin həyat yolu geniş təsvir edilir. Roman, əsasən, nəsrlə yazılır, lakin nəzmlə yazılan romanlar da vardır. Bunlara mənzum roman deyilir.

Romantizm — latınca romanlarda olduğu kimi deməkdir. Bu yaradıcılıq metodu ilə yazılan əsərlərdə sənətkar həyatda mövcud olanı deyil, arzu olunanı təsvir edir. O, arzuladığı, xəyalında yaratdığı həyatı, müstəsna şəraitdə fəaliyyət göstərən xəyali surətləri təsvir etməklə həyatı dəyişdirib yeniləşdirməyə can atır. Azərbaycan ədəbiyyatında Nizaminin “Xəmsə”sinə daxil olan mənzum romanlar romantizm metodu ilə yazılmış əsərlərin klassik nümunəsidir.

Rübai — lirik növün cəmi dörd misradan ibarət olan, ictimai-əxlaqi, fəlsəfi məzmun daşıyan janrıdır. aaba şəklində qafiyələnir. Həcmcə kiçik olmasına baxmayaraq, dörd misrada bitkin, məna və ideyaca dərin fikir ifadə edilməlidir. Bəzi rübailərdə misraların dördü də həmqafiyə olur. Rübai əruz vəzninin həzəc bəhrində yazılır. Klassik ədəbiyyatımızda Məhsəti Gəncəvi rübainin böyük ustadı sayılır.

Satira — müxtəlif ədəbi növ və janrlarda (hekayə, şeir, dram və s.) ictimai həyatdakı mənfilikləri qəzəblə ittiham edən, kəskin surətdə ifşa edən əsərlərə deyilir. Satirada ifşaedici, öldürücü gülüş əsas yer tutur, sənətkar həyatın eybəcər tərəflərini qəsdən qabardır, mübaliğəli təsvir edir. O, həmin mənfiliklərin insan həyatına, mənəvi dəyərlərə zidd olduğunu göstərməklə oxucunu düşünməyə, mənfi hallara qarşı mübarizə aparmağa sövq edir. Yumor isə islahedici gülüşdür, oxucuda tənqid hədəfinə mərhəmət hissi doğurur.

Sarkazm — yunan sözüdür, acı, istehzalı gülüş, rişxənd deməkdir. Cəmiyyətdə, insan xarakterində və əməllərindəki nöqsanlara münasibətini sənətkar açıq, satirik mahiyyətli kəskin gülüşlə ifadə edir. Sarkazm komik məzmunlu bədii vasitə kimi istehzaya çox yaxındır, lakin istehzadan fərqli olaraq, sarkazmda yüksək emosional münasibət, inkarçı mövqe, qəti etirazın yüksək pafosla ifadəsi əsasdır.

Sufizm — orta əsrlər islam Şərqində geniş yayılmış dini təriqət, mənəvi-əxlaqi düşüncə və davranış sistemidir. Sufi ərəb sözü olub qaba yundan hazırlanmış parça mənası verir. İlk sufilər zənginlikdən uzaq sadə həyat yaşadıqlarını, başqalarından fərqli qrup olduqlarını göstərmək üçün yun paltar geyinirdilər. Onlar nəfsə uymamağı, dünya nemətlərindən uzaqlaşıb mənəvi təmizlənmə yolu ilə Allaha qovuşmağı öz məqsədlərinə çevirmişdilər. Orta əsrlər Azərbaycan klassik ədəbiyyatında sufizm ideyaları geniş əks olunmuşdur.

Süjet — bədii əsərdə hadisələrin müəyyən xətt üzrə inkişaf etdirilməsinə deyilir. Süjet fransız sözü olub, əsərdə təsvir olunan mahiyyət və hadisə deməkdir. Süjet xəttinin inkişafında beş əsas mərhələ var:

Ekspozisiya — (bədii müqəddimə, bədii zəmin, giriş) gələcəkdə baş verəcək hadisələrin təməli qoyulur. Hadisənin başvermə şəraiti aydınlaşdırılır.
Zavyazka (düyün) — vəziyyətin getdikcə mürəkkəbləşməsini, hadisələrin inkişafında maneə, düyün yarandığını göstərir.
Kulminasiya (zirvə nöqtəsi) — hadisələrin, ziddiyyətlərin ən yüksək inkişaf nöqtəsinə çatdığını göstərir.
Razvyazka (açılış) ziddiyyətlərin tədricən aradan qalxdığını, hadisələrin, düyünün açılmağa doğru getdiyini göstərir.
Final — (bədii sonluq) hadisələrin müəyyən sonluğa çatmasıdır.

Tarixi mənzumə — mövzusu tarixdən götürülmüş əsər. Nəzmlə yazılan süjetli lirik və ya epik şeir.

Təcnis — ərəb sözüdür, mənası eynicinsli deməkdir. Lirik növün bu janrının qafiyə sistemi qoşmadakı kimidir. Birinci bəndi abvb, sonrakı bəndlər cccb dddb şəklində qafiyələnir. Lakin qoşmadan fərqli olaraq, təcnisdə qafiyələr cinaslardan — fonetik tərkibinə, səslənməsinə görə eyni, mənaca müxtəlif olan sözlərdən ibarət olur. Cinas qafiyələr fikri daha təsirli, emosional çatdırmağa imkan verir.
Təcnisin müxtəlif növləri var. Cığalı təcnisdə hər bir bəndin içində dörd misralıq bayatı verildiyi üçün bənddəki misraların sayı səkkiz olur. Ayaqlı təcnisdə bəndlərin sonuna “ayaq”, “artırma” adlanan beş-altı hecalıq misra əlavə olunur. Dodaqdəyməz təcnisdə b, p, m — qoşa dodaq samitləri işlədilməyi üçün dodaqlar bir-birinə dəymir.

Təhkiyə — epik əsərlərdə (əfsanə, nağıl, dastan, təmsil, hekayə) hadisə oxucuya təhkiyə (danışmaq, söyləmək, nağıl etmək) yolu ilə çatdırılır. Əsərdəki hadisələr ya müəllifin, ya da qəhrəmanın dilindən nağıl edilə bilər.

Təkrir — bədii əsərdə eyni sözün, söz qrupunun, ifadənin məqsədli şəkildə təkrar olunmasına deyilir. Təkririn iki növü var: anafora və epifora; anafora — misranın, cümlənin əvvəlində işlənən təkrirdir; epifora — misranın, cümlənin sonunda işlənən təkrirdir.

Tərcibənd — lirik növün bu janrı qafiyələri müxtəlif olan bir neçə bənddən ibarət olur. Birinci bəndin sonundakı beyt digər hissələrin də sonunda təkrar işlədilir.

Tərənnüm — bədii əsərdə hadisələrin, qəhrəmanın hərəkətlərinin, təbiət gözəlliklərinin yaratdığı xoş hislərin, müsbət arzu və istəklərin obrazlı, ahəngdar ifadəsidir.

Tərkibbənd — klassik şeir formalarından biridir. Tərkibbənddə hər bəndin sonunda misraları həmqafiyə olan beyt verilir. Hər bəndi altı misradan iyirmi və daha çox misrayadək olan tərkibbəndlər var. Qafiyələnmə qaydası müxtəlifdir. Bəndlərdəki beytlər aa bb cc dd və ya aa ba ca da şəklində qafiyələnə bilir.

Təsvir — bədii əsərdə hadisənin, qəhrəmanın, əşyanın, təbiət mənzərəsinin əlamətlərinin sözlə ifadəsidir.

Tuyuq — türkcə duyğu, duymaq sözündəndir. Hikmətamiz məzmun daşıyan tuyuq dörd misradan ibarət olur, aaba şəklində qafiyələnir. Əruzun rəməl bəhrində yazılır. Klassik ədəbiyyatımızda Qazi Bürhanəddin öz tuyuqları ilə məşhurdur.

Teqlər:
ədəbiyyat
, terminlər
, edebiyyat terminleri
, ədəbiyyatşünaslıq
, ədəbiyyat nəzəriyyəsi
, ədəbiyyat terminləri

ƏDƏBİYYAT – MƏNƏVİYYATDIR

E) Ədibin “Ötən günlər hekayələri” , “Günün hekayələri” , “Mətləb hekayələri” əsərlərində sovet dövrünün açıq aşkar tənqidi verilmişdir.

2. M.Cəlal aşağıdakı hekayələrindən hansılar “Ötən günlər” hekayələri silsiləsinə aiddir?
1. “Söyüd kölgəsi” 3. “İclas qurusu”
2. “Bostan oğrusu” 4. “Elçilər qayıtdı”
A) 1,2,4 B) 1,3,5 C) 2,5
3. “Arıçılığı öyrənmək üçün Moskvaya gedən bir tələbədən Qabaqtəpə balını. soruşublar. ”
Yuxarıdakı sətirlər hansı əsərdən götürülmüşdür?
A)”Qoltuq radiosu” B) “Şaftalı söhbəti”
C) “Elçilər qayıtdı” D) “Həkim cinayətov”
E) “İclas qurusu”
4. “Vaqif” dramı ilə bağlı xronoloji ardıcıllığı düzün:
1. Gülnar Vaqifin evinə gəlin köçür.
2. Xuraman Vaqifə xəyanət edir.
3. Vaqiflə Qacar üz-üzə gəlir.
4. Eldarla Qacar üz-üzə gəlir.
5. Vaqif “Bax” qəzəlini söyləyir.
A) 1,2,3,4,5 B) 4,5,3,2,1 C) 1,2,5,4,3
D) 1,5,3,2,4, E) 5,4,3,2,1
5. Hansı roman XX əsr Azərbaycan kəndlisinin taleyini ümumiləşdirilmiş şəkildə əks etdirir?
A) “Açıq kitab” B) “Bir gəncin manifesti”
C) “Yaşıdlarım” D) “Təzə şəhər”
E) Dağlar dilə gəldi”
6. “Heydərbabaya salam” poeması haqqında verilənlərdən biri səhvdir:
A) Poemada süjet xətti yoxdur.
B) Əsər lirik poema olub, heca vəznində yazılmışdır.
C) Poema 2 hissədən ibarət olub, öz dilimizdədir.
D) Əsərin birinci hissəsi realizmi, ikinci hissəsi isə romantik duyğuları əks etdirir.

E) Poemada, şairin fikrincə, mərd, vətənpərvər oğullar xalqı əsarətdən xilas edə bilər, Heydərbaba dağı da şairin “uşaqlıq qibləgahı” adlandırılmışdır.

7. Əsərləri xronoloji ardıcıllıqla düzün.
1. “Yolumuz hayandır”
2. “Təzə şəhər”
3. “Açıq kitab”
4. “Dirilən adm”
5. “Bir gəncin manifesti”
6. “Yaşıdlarım”
A) 1,5,4,3,2,6 B) 4,3,1,5,6 C) 4,5,3,6,2,1
D) 4,5,3,6,1,2 E) 1,5,4,3.6,2
8. Aşağıdakı sürətlərdən biri “Bir gəncin manifesti” əsərində mənfi obrazdır:
A) Mərdan B) Yəhya C) Bağır
D) Ağarəşid E) Yaqub

9. Yazıçının hansı hekayələrində həyatiliyi, təbiiliyi ilə yadda qalan obrazların timsalında oxucu özünü və müasirlərini görə bilir?(Açıq test)

1. “Bostan oğrusu” 2 . “Vicdan əzabı”
3. Qonaqpərəst” 4. ”Pillələr”
10. M.Cəlal haqqında verilən fikirlərdən biri yanlışdır:
A) Böyük Vətən müharibəsində cəbhələrdə iştirak etmişdir.

B) 1940- cı ildə “ Füzuli şerinin poetik xüsusiyyətləri ” mövzusunda namizədlik dissertasiyasını müdafiə etmişdir.

C) Bədii yaradıcılığa nəsrlə başlamışdır.
D) Onun yüzillik yubileyi YUNESKO səviyyəsində qeyd olunmuşdur.
E) Bakıda və Gəncədə adına küçələr var.
11. M.Cəlalın tərbiyəvi və ibrətamiz mövzuda yazdığı hekayələr sırasına daxil deyil:
A) “Ləyaqət” B) “İnsanlıq fəlsəfəsi”
C) “Xoşbəxtlik barəsində” D) “Kərpickəsən”
E) “Yolumuz hayandır”
12. S.Vurğunun şeir kitablarını müəyyənləşdirin:
1. “Küləklər” 2. “Şairin andı”
3. “Fanar” 4. “Könül dəftəri”
5. “Ələmdən nəşəyə” 6. “Şairin ölümü”
A) 1,2,6 B) 3,4,5 C) 1,3,5 D) 2,5,6 E) 2,3,4
13. S. Vurğunun həyatı və yaradıcılığı ilə bağlı yalnış fikri müəyyən edin:
A) Nəzmlə yazılmış dramları var.
B) 1936-cı ildə İ.V.Stalinin qəbulunda “Rəhbərə salam” poemasını oxumuşdur.
C) İlk şeir kitabı “Şairin andı” adlanır.
D) 30-cu illərin əvvəllərində 30 poemadan ibarət “Azərbaycan” epopeyasını yazmaq istəmişdir.
E) Heca vəzninə daha çox üstünlük vermişdir.
14. “Vaqif” dramı haqqında verilənlərdən hansı düzdür?
A) S.Vurğunun son dramıdır.

B) Əsərin əsas mövzusunu Azərbaycan xalqının XVII əsrin sonlarında xarici qəsbkarlara qarşı mübarizə təşkil edir.

C) Xalq mübarizəsinə Vidadi başçılıq edir.
D) Eldar əsərin mənfi obrazıdır.

E) Müəllif İbrahim xanla Vaqifin münasibətini təsvir edərkən özünün M.C.Bağırovla olan əlaqələrinə haqq qazandırmışdır.

15. Fikirlərdən biri yalnışdır:
A) “Rəhbərə salam” şeirini Stalinə həsr etmişdir.
B) “Xanlar” dramında Lenin obrazı da canlandırılmışdır.
C) “Şairin ölümü” şeirini M.P.Vaqifə həsr etmişdir.
D) 1935 – ci ildə “Azərbaycan” şeirini yazmışdır.
E) 1945 – ci ildə Azərbaycan Elmlər Akademiyasının ilk akademiklərindən olur.
16. “Təbiət ilhama çağırır məni” leytmotivi hansı əsərə aiddir?
A) “Aygün” poemasına B) “Muğan” poemasına
C) “Komsomol” poemasına
D) “Vətən keşiyində” şeirinə
E) “Şairin ölümü” şeirinə
17. Səhv fikri müəyyənləşdirin:
A) “Haqqın səsi” poemasında “İnsanın vətəni yer kürəsidir” ideyası təbliğ olunur.
B) “El bülbülü” şeiri Əbülfəz Hüseynliyə ünvanlanmışdır.
C) “Səhəndiyyə” poeması heca vəznində yazılmışdır.
D) “Səhəndiyyə” poeması Bulud Qaraçorlu Səhəndə cavab alaraq yazılmışdır.
E) “Şeir və hikmət” poemasını Şəhriyarın fəxriyyəsi də hesab etmək olar.
18. Ə.Haqverdiyevin “Məhəmməd şah Qacar” əsəri ilə “Vaqif” pyesi arasındakı oxşarlıq deyil:
A) Hər ikisi eyni tarixi hadisədən götürülmüşdür.
B) Hər ikisi 20-ci əsrin I yarısında qələmə alınmışdır.
C) Hər ikisindən eyni tarixi şəxsiyyətin proobrazı yaradılmışdır.
D) Hər ikisi eyni ədəbi növdə – dramatik növdədir.
E) Hər ikisi eyni ədəbi janrda, faciə janrında yazılmışdır.
19. Şair kimin divanına üz tutmaqla “Şəhriyar” təxəllüsünü götürmüşdür?
A) S.Şirazinin B) S.Vurğunun
C) M.Füzulinin D) H.Şirazinin
E) C.Cabbarlının
20. S.Vurğunla M.Şəhriyar hansı eyniadlı əsərin müəllifidirlər?
A) “Şairin ölümü” B) “Azərbaycan”
C) “El bülbülü” D) “Qaçaq Nəbi”
E) “Rəhbərə salam”
21. Hansı poemada “İnsanın vətəni yer kürəsidir” ideyası aparıcıdır?
A) “Səhəndiyyə”
B) “Haqqın səsi”
C) Qardaşım oğlu Hüşəngə”
D) “Stalinqrad qəhrəmanları”
E) “Gecənin əfsanəsi”

22. M.Şəhriyar “Heydərbabaya salam” və “Səhəndiyyə” əsərləri ortaq olmayan bütün cəhətləri müəyyənləşdirin.

1. Eyni dildə yazılması.
2. Bəndlər şəklində olması.
3. Epik poema hesab edilməsi.
4. Eyni janrda olması.
5. Eyni vəzndə olması.
A) 1,2,4,5 B)1,2,5 C) 2,3,5, D) 3,4,5 E) 1,2,3
23. Hansı M.Şəhriyarın nakam məhəbbət mövzusunda yazdığı lirik şeirlərdən hesab edilə bilməz?
A) “Behcətabad xatirəsi”
B) “Köynəyin qoxusu”
C)”Nişapurda günəş batarkən”
D) “Dəli Pəri”
E) “Odda yanan pərvanə”
24. “O taydadır Şəki, Şirvan, Qarabağ,
Bu tayda da Məşkin, Əhər, Qaradağ.
Bir-birlərin Arazdan almış soraq.
Araz bizi ayırmadan dağlayıb,
Son özü də gecə-gündüz ağlayıb.”
Bənd Şəhriyarın hansı əsərindəndir?
A) “Şeir və hikmət”
B) “Qaçaq Nəbi”
C) “Heydərbabaya salam”
D)“El bülbülü”
E) “Məmməd Rahim həzrətlərinə cavab”
25. S.Vurğunun tərcümələri və ən uğur qazandığı tərcümə:
1. S.Rustavelinin “Pələng dərisi geymiş pəhləvan”
2. Sədi Şirazi “Gülüstan”
3. N.Gəncəvi “Leyli və Məcnun”
4. Puşkin “Yevgeni Onegin”
5. N.Gəncəvi “Xosrov və Şirin”
6. M.Qorki “Qız və ölüm”
7. Çavçavedzi “Şair, “Vətən”
8. C.Cambul “Ellər baharı”
A) 1,3,4.6,7,8, “Yevgeni Onegin”
B) 1,2,5,6,7,8 “Leyli və Məcnun”
C) 2,4,6,7, “ Yevgeni Onegin ”
D) 1,5,6,8, “Leyli və Məcnun”
E) 2,3,4,7,8, “Yevgeni Onegin”
Yaxşıdı 7sinif var?? Yanıtla Sil
Cavabları var? Yanıtla Sil
Allah belanızı versin Yanıtla Sil
Salam cavabları var ? Yanıtla Sil

Social Profiles

Sayfalar

Blog Archive

▼2014 (5)
- ▼Temmuz (5)
  - ADA Universiteti (ADA) abituriyentləri və valideyn.
  - Bakı şəhəri üzrə ümumtəhsil məktəblərində çalışan .
  - Ali təhsil müəssisələrinə qəbulda 500 və daha yüks.
  - Ümumi orta təhsil bazasında (9 illik ) orta ixtisa.
  - Təhsil Nazirliyinin Telefon Məlumat Mərkəzinə 2014.
  Çingiz Muradlı
  
  Haqqımda – Çingiz Muradlı
  
  Mən, Muradlı Çingiz Məzahir oğlu 30 iyul 1978-ci ildə İsmayıllı şəhərində anadan olmuşam. 1981-1984-cü illərdə İsmayıllı şəhər 1 saylı uşaq bağçası-körpələr evinə getmişəm.
  
  1984-cü ildə İsmayıllı şəhər 2 saylı tam orta məktəbinin I sinfinə qəbul olunmuşam. 1995-ci ildə orta məktəbi yüksək qiymətlərlə bitirib elə həmin ildə də N.Tusi adına Azərbaycan Dövlət Pedaqoji Universitetinin filologiya fakültəsinə qəbul olunmuşam. 1999-cu ildə ali məktəbi bitirmişəm. 1999-2000-ci illərdə Azərbaycan Silahlı Qüvvələrində həqiqi hərbi xidmətdə olmuşam. 2000-ci ilin avqust ayından İsmayıllı rayon Lahıc qəsəbə tam orta məktəbində pedaqoji fəaliyyətə başlamışam. 2001-ci ildən hal-hazıra kimi İsmayıllı şəhər E.Məmmədov adına 3 saylı tam orta məktəbində Azərbaycan dili və ədəbiyyat fənlərini tədris edirəm. İşlədiyim müddətdə daim öz üzərimdə işləmiş həm metodiki, həm də ixtisasım sahəsində gedən yenilikləri öyrənərək dərslərimə tətbiq etmişəm. Bunun nəticəsidir ki, İsmayıllı RTŞ-nin rəhbərliyi tərəfindən işimdə irəli çəkilərək əvvəlcə 2003-cü ilin fevral- avqust aylarında İsmayıllı şəhər İ.Həsənov adına 1 saylı tam orta məktəbinə tərbiyə işləri üzrə direktor müavini, daha sonra 2003-cü ilin sentyabr ayından 2007-ci ilin avqust ayınadək İsmayıllı şəhər E.Məmmədov adına 3 saylı tam orta məktəbinə tədris işləri üzrə direktor müavini təyin edilmişəm. 2007-ci ildə ərizəmə əsasən vəzifədən azad edilmişəm. Təhsil sahəsində aparılan islahatlar hər bir müəllim kimi məni də yeniliklərə sövq edir, daha çox öyrənib daha çox öyrətməyə təhrik edirdi. Odur ki, 2004-cü ildən başlayaraq müxtəlif illərdə bir –birinin ardınca 20-yə yaxın təlim-treninqlərdə iştirak etmişəm. 2004-2005-ci illərdə Dünya Bankının dəstəyi iləTN-nin və Açıq Cəmiyyət İnsititutunun Məktən Qrant Proqramları çərçivəsində təlimlərində iştirak etmiş, nəticədə İsmayıllı və regionda ilk dəfə olaraq “Təhsil Resurs Mərkəzi” adlı layihəni udaraq 3 saylı orta məktəbdə resurs mərkəzini yaratmışam. Bu mərkəz vasitəsi ilə rayonda və regionda internetə qoşulan ilk məktəb bizim məktəb olub. Təhsil Resurs Mərkəzi bu gün də öz fəaliyyətini davam etdirir, həm məktəbimizin, həm də rayonumuzun müəllimlərinə xidmət göstərir. 2008-ci ildə AMİ-nin Şamaxı filialında ixtisas artırma kursundan keçmişəm. 2008-ci ildən başlayaraq TN-nin və Mədəd-Azərbaycanın 10-dan yuxarı təlimlərində,2011 və 2012-ci illərdə UNİCEF təlimlərində iştirak etmiş və təlimçi statusu almışam. Əvvəlcə təlimçi, daha sonra baş təlimçi kimi Təhsil Nazirliyinin və Mədəd-Azərbaycanın bir çox təlimlərində, eləcə də Müəllimlərin Peşəkarlıq Səviyyəsinin Təkmilləşdirilməsi təlimləri çərçivəsində İsmayıllı, Ağdaş, Şəki, Qax, Oğuz rayonlarında 2000-dən çox müəllimə təlim keçmişəm və onlara təhsildəki yenilikləri öyrətməyə çalışmışam. Artıq 3 ildir ki, kurikulum təlimçisi kimi Bakı, Sumqayıt, Ağsu, Göyçay, Qax, Hacıqabul, Zərdab, Cəlilabadda 200-dən çox müəllimə kurikulum təlimlərini keçmişəm. 2008-2009-cu tədris ilində “Ən yaxşı müəllim” müsabiqəsinə qatılmış, Azərbaycan Respublikası Prezidentinin 1 sentyabr 2009-cu il tarixli sərəncamı ilə müsabiqənin qalibi olmuşam. Bütün bunlar məni daha da irəli getməyə və öz üzərimdə daha çox işləməyə təhrik etmişdir. Odur ki, əvvəlcə 2012-ci ildə M.V.Lomonosov adına Moskva Dövlət Universiteti və “1sentyabr” Pedaqoji Universitetində distant təhsil alaraq metodiki sahə üzrə ixtisasartırma vəsiqəsi almışam. Daha sonra 2013-2014-cü tədris ilində TQDK-nın qəbul imtahanlarında uğur qazanaraq SDU-nun Azərbaycan dili və ədəbiyyatın tədrisi metodikası və metodologiyası ixtisası üzrə magistr təhsili alıram. 22-23 iyun 2013-cü il tarixlərində AzETA-nın beynəlxalq təlimində “İKT-dən istifadə etməklə interaktiv dərsin qurulması” mövzusunda təlimçi kimi təlim aparmışam. İşlədiyin 14 illik fəaliyyətim boyu 200-dən artıq şagirdim müxtəlif ali məktəbləri bitirmiş, 42 nəfər isə Azərbaycan dili və ədəbiyyat müəllimi ixtisasına yiyələnmişdir. Onlarla şagirdim 600-dən yuxarı bal toplamış, bunlardan 2-si müxtəlif illərdə 690, 2-si 680-dən çox bal toplayaraq uğur qazanmışlar. Şagirdlərimdən Şəhla Səmədli, Rəvan Məmmədov, Aydan Ağazadə müxtəlif illərdə Prezident təqaüdçüsü olmuşlar. Şagirlərim dəfələrlə fənn olimpadalarında mükafata layiq yerlər tutaraq rayon birincisi olmuç, dörd dəfə fənn olimpiadalarının respublika turuna vəsiqə qazanmışlar.İki şagirdim Qumru Hacıyeva 2004-cü ildə, Həsən Kamil isə 2010-cu ildə IV, bir şagirdim Fidan Canaliyeva isə 2013-cü ildə fənn olimpiadalarının respublika turunda III dərəcəli diploma layiq görülmüşlər. İşlədiyim müddətdə şagirdlərimi müxtəlif bilik və yarışlara qatılmağa sövq etmişəm və onların qalib olmaları üçün əlimdən gələn köməkliyi etmişəm. Nəticədə şagirdim Həcər Novruzova 2013-cü ildə “M.F.Axundzadə 200” inşa yazı müsabiqəsinin respublika turunda II dərəcəli diploma layiq görülmüşdür. Fidan Canaliyeva isə 2014-cü ildə Ümummilli Lider Heydər Əliyevin anadan olmasının 91-cü il dönümünə həsr olunmuş “Heydər Əliyev – 91” inşa müsabiqəsinin respublika turunda iştirak etmiş, fərqlənərək Təhsil Nazirinin diplomuna layiq görülmüş, inşa yazı işi isə “H.Əliyev uşaqların gözü ilə” kitabında dərc olunmuşdur. Hazırladığım “Babadağ” komandası 2004-cü ilə AZTV-nin “Tusi klubu” intellektual yarışının respublika üzrə qalibi olmuş və “Super kubok”a layiq görülmüşdür. 2013-cü ildə komandam “Xəmsə” milli intellektual oyununun rayon və zona qalibi olmuş, respublika turunda isə II yerə layiq görülmüşdür. Əldə etdiyim uğurların müqabilində müxtəlif illərdə İsmayıllı Rayon İcra Hakiminin və İsmayıllı Rayon Təhsil Şöbəsinin rəhbərliyinin diplom və fəxri fəranları ilə təltif olunmuşam. 2013-cü ildə təhsil sahəsindəki uğurlarıma görə Təhsil Nazirinin əmri ilə “Qabaqcıl təhsil işçisi” döş nişanı və vəsiqəsi ilə təltif olunmuşam. 29 may 2014-cü il tarixdə Təhsil Şurası və “Təhsil və zaman” qəzetinin birgə keçirdiyi “Ən yaxşı məqalə” müsabiqəsinin qalibi olmuşam.
  Related posts:

DƏBİYYAT – MƏNƏVİYYATDIR

Ədəbiyyat terminləri lüğəti

ƏDƏBİYYAT – MƏNƏVİYYATDIR

Social Profiles

Popular Posts

Sayfalar

Blog Archive

Çingiz Muradlı

Haqqımda – Çingiz Muradlı

Related posts: