Beynəlxalq münasibətlər tarixi (Qədim dövr və orta əsrlər)” dərsliyinin təqdimatı keçirilib

Şəmsiyyə Əliqızı,
Könül Əliyeva, “İki sahil”

Beynelxalq münasibetler tarixi

Noyabrın 22-də Bakı Slavyan Universitetinin (BSU) Beynəlxalq münasibətlər, regionşünaslıq və jurnalistika fakültəsinin təşkilatçılığı ilə universitetdə Azərbaycan Respublikası diplomatik xidmət orqanlarının yaranmasının 100 illiyinə həsr olunmuş “Azərbaycan müasir beynəlxalq münasibətlər sistemində” mövzusunda doktorant, magistrant və bakalavrların beynəlxalq elmi-praktik konfransı keçirilib.

Qeyd edək ki, bu beynəlxalq elmi-praktik konfransın yüksək səviyyədə təşkili və keçirilməsi üçün BSU-da universitetinin rektoru, professor Nurlana Əliyevanın sədri olduğu 17 nəfərdən ibarət Təşkilat Komitəsi yaradılıb.

Konfrans Azərbaycan Respublikasının dövlət himninin səsləndirilməsi ilə başlayıb.

Konfransda Təhsil Nazirliyinin Elm, ali və orta ixtisas təhsili şöbəsinin Elm sektorunun müdiri, professor Əfqan Abdullayev, Xarici İşlər Nazirliyinin xüsusi tapşırıqlar üzrə səfiri Gündüz Cəfərov, Azərbaycan Dövlət Neft və Sənaye Universitetinin professoru Camal Mustafayev, təhsil eksperti, professor Şahlar Əsgərov iştirak ediblər. Konfransda bir çox xarici ölkələrin-Çexiya Respublikasının, Rusiya Federasiyasının, Türkmənistan Respublikasının, Qambiya Respublikasının, Çin Xalq Respublikasının və digər ölkələrin ali təhsil müəssisələrinin, eləcə də ölkəmizin ali məktəblərinin və Azərbaycan Milli Elmlər Akademiyasının müvafiq elmi-tədqiqat institutlarının təmsilçiləri iştirak ediblər.

Giriş sözü ilə çıxış edən rektor Nurlana Əliyeva konfransın keçirilməsinin BSU-nun beynəlxalq əlaqələrinin genişləndirilməsi istiqamətində atdığı növbəti uğurlu addım olduğunu deyib. Konfransın mövzusunun aktuallığını diqqətə çatdıran rektor bildirib ki, bu gün Azərbaycan beynəlxalq münasibətlər sistemində xüsusi yer tutur. Azərbaycanın dünyadakı müsbət mövqeyinin formalaşmasının əsası ulu öndər Heydər Əliyev tərəfindən qoyulub və bu siyasəti Prezident İlham Əliyev uğurla davam etdirir.

Rektor qeyd edib ki, bu konfransın keçirilməsi BSU-nun beynəlxalq əlaqələrinin genişləndirilməsi istiqamətində atdığı növbəti uğurlu addımdır. Konfrans müasir dövrümüz üçün çox aktual olan bir mövzuya həsr olunub və səmərəli fikir mübadiləsinin aparılması, qabaqcıl beynəlxalq təcrübənin təbliğ edilməsi baxımından mühüm əhəmiyyət kəsb edir. Bu mövzu yalnız müəllim və tələbələr üçün deyil, bütün Azərbaycan cəmiyyəti üçün olduqca vacibdir. Biz dünən Yeni Azərbaycan Partiyasının yaradılmasının 27-ci ildönümünü yüksək səviyyədə qeyd etdik. 27 il bundan öncə Azərbaycan dünya miqyasında tanınmırdı. Müstəqil Azərbaycan Respublikası ulu öndər Heydər Əliyevin böyük dühası nəticəsində dünya birliyinin layiqli üzvünə çevrilib, ölkəmizin beynəlxalq münasibətlər sistemində özünəməxsus yeri və mövqeyi var. Dövlət siyasətinin mərkəzində Azərbaycan vətəndaşı, onun hüquq və azadlıqlarının yüksək səviyyədə təmin edilməsi dayanır. Tolerantlıq və multikulturalizm Azərbaycanın dövlət siyasətinin əsas istiqamətlərindən biridir. Bu gün ölkəmiz Prezident İlham Əliyevin və Birinci vitse-prezident Mehriban xanım Əliyevanın uzaqgörən və mütərəqqi fəaliyyətləri nəticəsində mədəniyyətlərarası, dinlərarası dialoq mərkəzinə çevrilib. Azərbaycanın Birləşmiş Millətlər Təşkilatının Təhlükəsizlik Şurasının qeyri-daimi üzvü seçilməsi, Qoşulmama Hərəkatına sədr seçilməsi və dünya miqyasında siyasi nüfuzunun artması Azərbaycan diplomatiyasının uğurudur.

Nurlana Əliyeva vurğulayıb ki, ölkənin beynəlxalq əlaqələrinin formalaşması birbaşa olaraq dövlətin daxili siyasəti ilə bağlıdır. Ölkədə yürüdülən uğurlu daxili və xarici siyasət Azərbaycanın müasir beynəlxalq münasibətlər sisteminə inteqrasiyasını təmin edir.

Rektor çıxışında xüsusi vurğulayıb ki, ölkəmizdə elm və təhsilin inkişafına dövlət səviyyəsində diqqət və qayğı göstərilir. Bu da təbiidir, çünki elm və təhsil cəmiyyətin inkişafının hərəkətverici qüvvəsidir. Azərbaycan gəncləri dünyanın tanınmış, nüfuzlu və aparıcı universitetlərində ali təhsil alırlar. Rektor Nurlana Əliyeva çıxışının sonunda konfransın işinə uğurlar arzulayıb.

Təhsil Nazirliyinin Elm, ali və orta ixtisas təhsili şöbəsinin Elm sektorunun müdiri, professor Əfqan Abdullayev konfrans iştirakçılarını Təhsil Nazirliyinin rəhbərliyi adından təbrik edib və konfransın keçirilməsinin təqdirəlayiq olduğunu vurğulayıb.

Təhsil eksperti, professor Şahlar Əsgərov və professor Camal Mustafayev konfransın keçirilməsini yüksək qiymətləndiriblər və belə konfransların gənclərin intellekt səviyyəsinin yüksəlməsinə səmərəli təsir göstərdiyini qeyd ediblər.

Konfransın plenar iclasında BSU-nun tələbəsi Elnur Baharov “Azərbaycanın dövlətçilik ənənələrinin və diplomatiyasının inkişaf yolu”” mövzusunda, Həştərxan Dövlət Universitetinin tələbəsi Sabina Velikaya “Formirovanie transqraniçnoqo prostranstva v kaspiyskom reqione: opıt vzaimodeystvia Rossii i Azerbaydjana” mövzusunda, Karlov Universitetinin tələbəsi Yuliya Svetlova “Otnoşenia Çexii i Azerbaydjana: istoriçeskiy diskurs” mövzusunda, Qambiya Respublikasının nümayəndəsi Musa Ceesay “Azerbaijan – Gambia relations” mövzusunda çıxışlar ediblər.

BSU-nun Elmi işlər üzrə prorektoru, professor Rafiq Novruzov, Beynəlxalq münasibətlər, regionşünaslıq və jurnalistika fakültəsinin dekanı, dosent Şirinbəy Əliyev konfransın keçirilməsi ilə bağlı ətraflı məlumat veriblər.

Sonra konfrans öz işini 9 bölmədə-”Azərbaycanın beynəlxalq münasibətlər tarixində Azərbaycan Xalqı”, “Azərbaycanın xarici siyasət konsepsiyası və diplomatik əlaqələrinin inkişafında Heydər Əliyev amili”, “İlham Əliyev dövlət başçısı və peşəkar diplomat kimi”, “Azərbaycanın diplomatik xidmət orqanlarının formalaşması və təkamülü prosesi”, “Mədəniyyətlərarası və dinlərarası dialoq mərkəzi-Azərbaycan”, “Azərbaycanın xarici ölkələrlə ikitərəfli və çoxtərəfli əlaqələri”, “Azərbaycan Respublikasında humanitar elmlərin aktual problemləri”, “Azərbaycanın görkəmli diplomatları tarixi mənbələrdə və bədii yaradıcılıqda” bölmələrində davam etdirib. Bölmə iclaslarında ümumilikdə 209 məruzə dinlənilib və müzakirə edilib. Konfransın işçi dilləri Azərbaycan, rus və ingilis dilləridir.

Konfransın sonunda bölmə moderatorlarının hesabatları dinlənilib və müvafiq qərarlar qəbul edilib.

Şəmsiyyə Əliqızı,
Könül Əliyeva, “İki sahil”

“Beynəlxalq münasibətlər tarixi (Qədim dövr və orta əsrlər)” dərsliyinin təqdimatı keçirilib

Mayın 22-də Bakı Slavyan Universitetinin (BSU) beynəlxalq münasibətlər kafedrası tərəfindən hazırlanan “Beynəlxalq münasibətlər tarixi (Qədim dövr və orta əsrlər)” dərsliyinin təqdimatı olub.

BSU-dan AZƏRTAC-a bildirilib ki, tədbirdə bu universitetin elmi işlər üzrə prorektoru, professor Rafiq Novruzov dərsliyin tələbələr və müəllimlər üçün əhəmiyyətli mənbə olduğunu deyib. Diqqətə çatdırılıb ki, beynəlxalq münasibətlər kafedrasının dosentləri Ləman Qarayeva, Şəhla Nuruzadə və Zümrüd Məlikovanın müəllifi olduqları dərslik elmi mənbələr əsasında və dövlətimizin təhsil siyasətinə uyğun tərtib edilib. Müəlliflər qədim dövrdə və orta əsrlərdə dövlətlər arasında beynəlxalq münasibətlərin özünəməxsusluqlarını ictimai həyatın digər tərəfləri ilə sıx əlaqəli olan, eyni zamanda, öz qanunlarına əsasən inkişaf edən xüsusi reallıq kimi göstərməyə çalışıblar. Dərsliyin bütün universitetlərin istifadəsi üçün nəzərdə tutulduğunu deyən R.Novruzov yüksək səviyyəli əsər ərsəyə gətirdiklərinə görə müəllifləri təbrik edib.

Z.Məlikova diqqətə çatdırıb ki, “Beynəlxalq münasibətlər tarixi (Qədim dövr və orta əsrlər)” nəşri dördcildlik kitabın birinci hissəsidir. Gələcəkdə bu dərsliyin üç cildinin də çap olunması nəzərdə tutulub. İyirmi üç fəsildən ibarət olan dərslikdə hər müəllifin yeddi mövzusu əksini tapıb.

L.Qarayeva bildirib ki, dərslikdə sistemləşdirilmiş proqram əsasında mühüm tarixi faktlardan ibarət şərhlər də yer alıb. Nəşrdə beynəlxalq münasibətlərin formalaşmasını və təkamülünü şərh edən L.Qarayeva vurğulayıb ki, dərslikdə tarixi, siyasi təhlillərdən də istifadə olunub. Kitab həm bakalavrlar, həm də magistrlər üçün əvəzsiz mənbədir.

Azərbaycan Milli Elmlər Akademiyası (AMEA) Şərqşünaslıq İnstitutunun baş elmi işçisi, Bakı Dövlət Universitetinin beynəlxalq münasibətlər kafedrasının professoru Ramiz Sevdimalıyev və başqaları dərslik barədə müsbət fikirlərini bölüşüblər. Qeyd edilib ki, yüksək səviyyəli mütəxəssislər tərəfindən ərsəyə gələn bu nəşr siyasi elmlərin inkişafına mühüm töhfədir.